حوزہ نیوز ایجنسی کی رپورٹ کے مطابق، اے ایم آر میڈیکل اینڈ ایجوکیشنل ٹرسٹ دہلی نے اپنے مشن کو "کیمپ سے ہاسپٹل تک“ مریضوں کی مدد کے لیے آج بروزِ ہفتہ، 15 نومبر کو ایک اہم عملی قدم اٹھایا اور گزشتہ 9 نومبر کو میرزا یوسف علی ویلفیئر ٹرسٹ، اولڈ مصطفی آباد دہلی میں منعقدہ فری آئی میڈیکل کیمپ میں جن بچوں کی بینائی کمزور پائی گئی تھی، انہیں آج شاہد میرزا صاحب کے تعاون سے لائف لائن آئی سینٹر دہلی لایا گیا، جہاں ان کا تفصیلی معائنہ کیا گیا۔
آئی اسپیشلسٹ ڈاکٹر جاوید فاروقی نے تمام بچوں کی آنکھوں کا نہایت باریک بینی سے جائزہ لیا اور ہر بچے کی بصارت کے بارے میں والدین کو تفصیل سے آگاہ کیا۔ ڈاکٹر صاحب نے علاج کے مراحل، کمزور بینائی کی ممکنہ وجوہات اور آئندہ حفاظتی اقدامات پر بھی روشنی ڈالی۔
اس موقع پر ڈاکٹر جاوید فاروقی نے کہا کہ "ہم اے ایم آر میڈیکل اینڈ ایجوکیشنل ٹرسٹ کے ساتھ مریضوں کی خدمت کے لیے ہر وقت حاضر ہیں۔ کمزور اور مستحق افراد کی مدد کرنا ہی اصل مقصدِ حیات ہے، اور ہم ٹرسٹ کے آئندہ کیمپوں میں بھی اپنی خدمات بھرپور طریقے سے جاری رکھیں گے۔"
میرزا یوسف علی ویلفیئر ٹرسٹ مصطفی آباد دہلی کے چیئرمین شاہد مرزا کی خصوصی کاوشوں سے بچوں کی اسپتال تک رسائی ممکن ہوئی، جبکہ اے ایم آر ٹرسٹ اور لائف لائن آئی سینٹر دہلی نے حسبِ سابق تمام سہولیات مکمل طور پر فری فراہم کیں۔
ٹرسٹ کی انتظامیہ نے کہا کہ یہ سلسلہ جاری رہے گا اور بصارت سمیت دیگر امراض کے حوالے سے بھی ہر ضرورت مند فرد کو مکمل رہنمائی اور علاج کی سہولت فراہم کی جاتی رہے گی۔
کیمپ کے دوران مولانا سید شان حیدر بھی موجود رہے اور مریضوں کی رہنمائی میں فعال کردار ادا کرتے رہے۔
اے ایم آر میڈیکل اینڈ ایجوکیشنل ٹرسٹ کے چیئرمین مولانا سید رضی زیدی نے اس خصوصی خدمت پر ڈاکٹر جاوید فاروقی صاحب، جناب شاہد مرزا صاحب، جناب محمد حسین نقوی امروہوی صاحب اور تمام معاونین کا تہہ دل سے شکریہ ادا کیا۔
انہوں نے کہا کہ ہم دعا گو ہیں کہ اللہ تعالیٰ ہماری اس خدمتِ خلق کو اپنی بارگاہ میں قبول فرمائے۔ آمین۔
10:03 - 2025/11/17
آپ کا تبصرہ